fbpx

Pregunta Frekuente

Hopi biaha hende ta mas interesá den ken ta tras di sierto mensahe ku e mensahe mes. Nos a opta pa laga e mensahe papia pa su mes promé i pa sali despues. For di prinsipio tabata e intenshon pa bini dilanti i duna kara. Esnan ku ta kontra di e mensahe ta purba distraí for di nos mensahe kla i raspá.

1)    Informá nos pueblo dje bentahanan pa Kòrsou tin mas koperashon ku Hulanda
2)    Un petishon di firma ku esnan na fabor di mas koperashon ku Hulanda por firma
3)    Empoderá YDK atrabes di akshonnan konkretu
4)    META FINAL: Yega na mesun derechonan ku habitantenan di Hulanda.

Fundashon Akshon Awor ta fundá konforme lei i ta inskribí na Kámara di Komèrsio.  Nos ke akshon awor pa trese kambio den Kòrsou su struktura estatal ku no ta funshoná. Fundashon Akshon Awor ta boga pa bini mas kòntròl riba gobièrnu pa stòp di malgastá nos plaka. Nos ta kere den mas koperashon ku Hulanda.

Kòrsou tin e derecho di outo-determinashon. Ta nos por disidí riba nos futuro. Si nos disidí ku nos ke bira provinsia, Hulanda mester aseptá esaki. Nos ta boga pa riba término haña e mesun derechonan ku habitante na Hulanda. Nos ta dispuesto pa yuda hunga un papel pa logra esaki.

Outonomía ta nifiká ku bo ta kapas di karga bo mes i para riba bo pia. Den aña 2010, Hulanda a saneá nos debe di ANG. 4.000.000.000, bahando esaki te na ANG. 1.300.000.000. Apesar ku nos ta yama nos mes outónomo for di 2010, nos no a logra NI ÚN AÑA DEN PLÙS, esta, sin defisitnan anual di miones. Es mas, entre 2011 i 2018, Kòrsou su defisit averahe tabata mas ku ANG. 100.000.000 pa aña pa un total di mas ku ANG. 800.000.000!
 
No tin sifra di 2019 ainda, pero e tabata un aña ku a konosé defisitnan hopi grandi kompará ku e añan anterior basá riba entre otro krisis na refinería. I pa motibu di COVID, 2020 lo bira hopi mas pio atrobe hibando nos na un defisit total aktual di riba 3.000.000.000 mion i niun hende no sa kuantu mas COVID lo bai kosta. Ta probable en todo kaso ku nos lo sinti e efektonan di COVID-19 pa múltiple aña mas.  Pues bon mirá nos ta outónomo pero na nòmber so.
 
Nos asina yamá outonomía no a funshoná. Pobresa a krese i tareanan básiko di gobièrnu manera kuido, edukashon i finansas públiko ta den peliger mientras no tin un plan pa nos sali for di e situashon prekario ku nos ta aden. Nos no ta pensa ku mester sigui pèrdè tempu pero bini ku kambio di direkshon pa yuda hende den ku nesesidat urgente i pa nos tur riba término por bai dilanti. Un kos ta sigur; si nos ke bai dilanti, nos mester invertí i subi nos produktividat. Nos ta konvensí ku Hulanda por yuda nos logra esaki.

Nò. Fundashon Akshon Awor ta konsistí di habitantenan prekupá di Kòrsou ku ke pa Kòrsou bai dilanti i ta boga pa nos habitantenan haña e mesun derechonan ku habitantenan na Hulanda mas pronto ku ta posibel. Esnan ku ta pretendé ku ta Hulanda ta tras di Fundashon Akshon Awor ta falta rèspèt na habitantenan di Kòrsou ku legítimamente ta di opinion ku mester bin un kambio den maneho di nos pais awor ignorando loke un kantidat grandi di hende ke. I nos ta biba den un pais liber kaminda kada ken tin derecho pa opiná lokual nan ke. Kòrsou ta un pais hulandes i Fundashon Akshon Awor no tin berguensa di esaki. Al kontrali, nos ta kontentu ku Kòrsou ta forma parti di Reino.

Nos por pero NO nos so. No ta nos abilidat ta nos estorbo mayó, pero e kantidat relativamente abou di 160.000 habitante . Rònt mundu nos no ta mira paisnan ku menos ku 500.000 habitante floresé. Sigur no esnan sin rekurso natural. Bo ta kere ku bo por nombra 3? Simplemente e gastunan pa ofresé un poblashon chikitu e rekursonan básiko (p.e. produkshon di koriente i awa, kuido i skol, mantenshon di karetera, polis i duane) ta muchu karu pa e totalidat di trahador lokal ku mester karga nan. Al kontrali, den e tempu insigur ku nos ta bibando aden, ta kumbiní nos buska stabilidat dor di forma parti di algu mas grandi ku nos, kual ta Hulanda i asta Union Europeo.

Nos ta biba den un otro tempu kaminda klaramente nos no por para riba nos mes. Krisis di Corona, kambio den temperature di mundu ku ta kousa disturbio di medio ambiente i disturbio nashonal. Kambio radikal i inkietut rònt mundu i serka di nos ta kousa mas insiguridat ku nunka. Nos mester bai den un direkshon ku ta kumbiní nos den presente i futuro, no den pasado.

No ta di kompará ku Kòrsou. Inglatera ta un pais grandi ku hopi rekurso. Realístikamente nos opshonnan ta limitá. Nos mester skohe loke ta kumbiní nos mirando nos tamaño. Nos tin hopi pobresa i mayoria hende no ta dispuesto di mira e pobresa aki sigui krese djis pa nos keda pretendé ku nos ta outónomo.

Nos ke biba riba nivel di Hulanda pero produsí riba nivel di Karibe. Pa tene kabes riba awa i sali for di buraku, nos mester ta dispuesto di hasi sakrifisio. Pa kompetí riba tereno internashonal nos mester traha riba nos disiplina, produktividat i servisio. Nos mester invertí den enseñansa riba tur nivel inkluso pa adulto. Pa logra, mas ku tur kos mester di fondo i hasi uzo di konosimentu na nos alkanse. Nos mester traha duru i kumpli ku palabrashon. I mester por tuma medida kontra di esnan ku ta abuzá di nan kondishonnan di trabou (p.e. mèldu malu sin ta malu, traha toko den toko). Òf ku simplemente no ta hasi nan trabou di un manera satisfaktorio i ku ta haña ku mester keda paga nan tòg. Tambe nos mester atendé finalmente kontra salarionan fuera di tur proporshon ku entidatnan di gobièrnu ta paga i ku nos isla no por karga. Admeas nos mester aktua duru kontra di korupshon ku ta espantoso i ku ta mata progreso.

Sklabitut tabata tempu ku un grupo no tabata liber. Danki Dios esaki ta den pasado. Esaki no kier men ku nos no a yega ainda kaminda nos mester ta. Pero, nos mester fiha nos bista riba futuro. Nos ta biba den un pais demokrátiko.  Nos ta boga pa mas pronto posibel NO tin diferensia entre habitantenan na Hulanda i na Kòrsou. Nos punto di salida ta pa haña mas tantu posibel e mesun derecho (i debernan) ku habitantenan na Europa. Nos ta realisá ku esaki lo ta un proseso di negosashon duru di años i ku ta bai den fase, pero e meta final ta pa nos tin mes derechinan ku habitantenan di Europa.

Hopi hende tin famia i relashon ku hulandes na Kòrsou i na Hulanda. Hopi famia ta di rasa mas i mas mesklá. Kòrsou no ta di hende di ningun koló, ni kla ni skur. Nos no mester laga kolor di nos kueru determiná ken nos ta konfia, ku ken nos ta anda ni kon leu nos ta yega. I mas ku tur kos, nos NO ta katibu i nos NO mester sinti nos mes katibu hamas. Hopi hende ta enkadená nan mes ku sklabitut mental i esaki ta stroba nan di wak i bai dilanti. Ta importante pa konosé bo pasado, pero tene kuenta ku bo pasado no ta determiná bo futuro. Libra bo mes di sklabitut mental. Meskos ku tin yu di Kòrsou bon i malu, tin hulandes bon i malu. Es mas, nos mester saka mas benefisio di nos relashon ku Hulanda, un dje paisnan mas avansá i ku mas rekurso na mundu, i ta habrí pa siña di nan. Pa logra esaki nos mester siña kumpli tambe ku palabrashon. Nos ta negoshá pa nos i Hulanda pa Hulanda. Esei no kier men ku nan ta nos enemigu òf ku nan ke nos malu. Nos mester siña trata ‘zakelijk’ ku Hulanda sin bira emoshonal pensandp kada bes riba pasado.

Ta bèrdat ku Hulanda no semper a kumpli. Meskos di otro banda probablemente Hulanda tambe ta haña ku nos a nèk nan den pasado pasobra hopi biaha nos a bisa pero despues nos no a hasi. Nos tampoko no a kumpli semper. I hustamente p’esei nos ta boga pa yega na un relashon kaminda na final no tin diferensia entre nos derecho i debernan kompará ku esnan di habitantenan na Hulanda. Nos mester keda skèrpi. Hulanda ta negoshá duru i nan tin mas rekurso ku nos, kual ta hasi negosashon difisil semper. P’esei nos mester yega na akuerdonan mas ‘waterdicht’ posibel ku kual nan no por keda sin kumpli fasilmente. Di otro banda nos tambe mester kumpli i trata i siña mira Hulanda no komo un amigu ni enemigu pero komo un partner kaminda nos ta kumpli ku nan i nan ta kumpli ku nos.

Boneiru a bai dilanti mientras Kòrsou a bai atras. 3% di desempleo. Kresementu ekonómiko anual. Mihó kòntròl riba mandatarionan. Gran mayoria di poblashon ta satisfecho ku e kambio. E proseso ta leu for di kla i mester sigui desaroyá. Kada desaroyo ta bin ku su sakrifisionan, pero na final e struktura ta kumbiní nan.

E proseso na Boneiru ta andando. Tin kos ku no ta lokual nan mester ta i por mehorá. Partikularmente pobresa serka hende grandi kousá pa subida di preis despues di dolarisashon. Den sierto sentido Boneiru a krese muchu lihé i siendo un pais ku un poblashon hopi mas chikitu ku Kòrsou, relativamente hopi no-Boneriano ta forma parti awor di nan poblashon. Boneiru tin ku sigui lucha pa drecha loke ta robes. I Kòrsou mester siña di lokual a bai robes na Hulanda.

Like i share nos Facebook posts. Si bo ta kere ku bo por kontribuí di forma adishonal, bo por manda nos un mensahe privá riba nos Facebook. Nos ke ofresé workshop kòrtiku pa amplia nan kapasidat. Si bo ta dispuesto pa duna workshop pa kompartí bo konosementu ku otronan pa yuda nan bai dilanti, plis tuma kontakto ku nos.

Nos struktura estatal no ta funshonando. Pobresa, inseguridat i korupshon ta for di man i realmente nos no ta outónomo. P’esei awor mas ku nunka nos mester buska mas aserkamentu ku Hulanda pa kaba ku pobresa, yuda nos trese trankilidat, oportunidat, maneho finansiero, hustisia i mayor bienestar pa nos tur. Pasobra kada unu di nos ta meresé esei!